**********************************************************************************
(7) 游水運動
搵過林醫師醫脊柱病患或骨傷痛症既街坊病友，一定都被林醫師建議過要做游水呢樣運動。
點解林醫師成日都叫人去游水架？對骨科痛症既病友黎講，本身已經有傷患在身，又或神經線受壓出現疼痛，如果做一d比較要用力或有負重既運動，一不小心又或用錯方式，就會搞到傷上加傷，令疼痛加劇，果陣就真係苦上加苦啦！並不係所有運動都識合所有人做架。
游水係重無負重運動，亦係可以運動四肢及全身既運動。水有浮力，係水入面運動，對人體骨骼、關節、筋腱等都唔會構成壓力，所以對一般骨傷痛症患者係勁有幫助，能加快治癒速度。而且游水又係一項可以練氣既運動，能加強心肺功能的。
所以呢，d醫師咪成日同d病人講，唔識游水唔緊要，都去玩下水，係水入面郁下手郁下腳啦，都有幫助架！
溫馨提示：
真係唔八下都唔知，雖然游水好處多，但同樣唔係個個人都適合去游水架，就好似血壓高同有心臟病既患者就已經唔適合啦。因為游緊水果陣身體溫度會有改變而令血管收縮引致血壓上升，有風險的。真係唔可以亂咁黎，要小心留意丫！游水雖然話係無負重運動咋，都要睇下身體受唔受到架！
游水前緊記要先做熱身運動，不能太劇烈，要慢慢游。家陣我地講緊既係鍛鍊身體，唔係比賽丫！
**********************************************************************************
(6) 有骨傷、痛症病患要戒口
有骨傷、痛症病患既病友，一定都聽過林醫師其中一樣既醫囑，就係要乖乖地戒口啦：
鴨、鵝、海鮮、芋頭、糯米、堅果、啤酒 ß 呢d全部都係骨傷、痛症病患大忌之物，千萬唔好食呀！食少少都唔得架，一食就會病發痛到飛起。站主呢類唔多聽話既病友絕對深明食物禁忌呢樣野啦！哈哈！
**********************************************************************************
(5) 骨科保健食物
一．含膠質食物
成日係診所聽到林醫師叫d骨科病人食番d含有膠質既食物補下d軟骨，咁含膠質既食物有邊幾樣呢？
a. 植物膠質食物
- 雪耳（站主首選推介。雪耳不肥膩、不含脂肪、不含膽固醇、價格較便宜）
- 雪耳可用黎煲湯煲糖水，最普遍有木瓜煲雪耳（但有傳聞煮好的雪耳不能隔夜食用，唔知係咪真，又唔知有乜根據會有咁既傳聞，有懷疑都係唔好隔夜食用啦）
- 雪耳又可以用黎煮餸：蒜蓉炒雪耳、雪耳炒雲耳、雪耳炒雞柳、雪耳炒內片...... 用來送飯好好味的
b. 動物膠質食物
- 花膠（超級貴價食物，價格貴得離譜，站主不推介）
- 豬手、豬皮、雞腳（煮完見到個樣都覺得好膠，唔止膠，仲好肥膩，食完有機會令脂肪及膽固醇指數上升，好味得黎唔多健康，站主建議少食）
- 雞軟骨，豬軟骨，仲有黏住豬手展仔果條筋，好好味，不話都係肥，好味都唔好食咁多
- 狗脊（中藥材一種，植物黎既。功效：補肝腎，除風濕，健腰腳，利關節。治腰背酸疼，膝痛腳弱，寒濕周痹，失溺，尿頻，遺精，白帶。）煲湯時加d狗脊就可以。
- 黑豆（中醫說以黑入腎。黑豆有保腎作用，而腎既健康又與骨科病患有影響）。可用黑豆煲水飲用（黑豆水無乜味的，同飲清水差唔多。價錢又平又可補腎，站主推介丫）
- 腰肌勞損保健湯水介紹：狗脊＋川斷＋杜仲＋黑豆＋豬腰
**********************************************************************************(4) 祛濕湯水
天氣潮濕既日子、人體內濕氣太重既時候，最好就煲d祛濕湯水飲下啦，有時都聽到林醫師叫d濕重既病人煲的。站主都唔係識好多架咋，少少都分享下啦。
一．雲苓、白述煲水
- 這個祛濕湯水味道似涼茶多d，唔係幾好味。站主會加埋南棗去煲，南棗有安神作用，個湯水好味d，飲左祛濕又好瞓d。
- 煲呢個湯水一般都係用雲苓片，雲苓片價錢較貴。以前有d舊式藥材舖會有雲苓碎賣，其實係雲苓片來貨時d碎片，功效一樣的，價錢平成半咁多，祇不過太碎煲好飲用時要隔渣。今時今日乜都貴，唔知仲會唔會有d有良心既藥材舖有雲苓碎賣啦。
二．土伏苓、牛大力、五指毛桃、赤小豆、扁豆煲水（加唔加瘦肉都得）
- 呢個湯水有祛濕解毒、舒筋活絡既刁功效。加幾粒蜜棗就好甜好好味。
- 加埋粉葛一齊煲，仲有埋去骨火功效。
三．薏米水（最平價抵飲祛濕飲品）
- 生薏米性微寒，適合體質較熱性者食用；而熟薏米寒性較輕，適合體質較寒涼者選用。
- 功效上，生薏米有利於祛濕除風；熟薏米則有助健脾益胃、治脾虛泄瀉。所以要去水腫的話，生薏米的食療功效比較高，利水祛濕功效亦較強。但又因食物寒熱性質既關係，站主比較鍾意生、熟薏米一齊煲，中和番囉。
- 要小心留意，孕婦不宜吃薏米，因為其質滑利。
- 薏米水有好多配撘都好好味（唔加糖都好好味）：
- 淨薏米水（祛濕；味道淡淡地）
- 薏米＋紅豆（祛濕去水腫；紅豆水味，煲得杰仲可以當紅豆粥食埋）
- 薏米＋黑豆（祛濕補腎：淡淡地無乜味）
- 薏米＋雪梨（祛濕清潤；雪梨切粒煲，甜甜地好好味；加埋馬蹄再甜d）
- 薏米＋竹蔗＋茅根（祛濕清熱；甜甜地好好味；加埋馬蹄再甜d）
- 薏米＋檸檬（祛濕清熱氣；酸酸地有檸檬香味都好好味）
- 生薏米、熟薏米點分架呢？
生薏米係一粒粒細細粒咁既
熟薏米係爆到開晒花好似爆谷咁既
**********************************************************************************
(3) 鍛鍊腰肌運動
林醫師教過站主做一個腰肌鍛鍊運動，要訓練番條腰有力量先得架。站主上網查過，原來個運動有名架喎，叫......
“飛燕式”運動
也叫“俯臥保健法”。在地上或床上仰躺著，全身放鬆，呼吸調順後，手放在身體兩側，雙腿伸直，然後將頭、上肢和下肢用力向上抬起，不要使肘和膝關節屈曲，要始終保持伸直，如飛燕狀。
溫馨提示：呢個腰肌鍛鍊運動係要靠腰力做架，唔可以運用手腳既力架。
**********************************************************************************
(2) 黑片糖水
係診所聽過有病友問“林醫師，我d皮膚好乾好痕呀，成日身痕點算好呀？”
（比站主我答既話就會問番個病友身痕係咪想比人打呀？哈哈！講笑！）
林醫師教搽黑片糖水
用法：1片黑片糖（一定要黑片糖架，一般街市雜貨舖有售）＋1公升水 à 煲到塊黑片糖溶左，放涼之後就搽得。
［各位病友可以放心試下呢個方法啦，一片黑片糖 + 1公升水 呢個濃度唔會惹蟻的。］
**********************************************************************************
(1) 檸檬水
檸檬水含有豐富維他命C，又可以幫身體去漬添。如果買唔到檸檬，用青檸代替都得，青檸又係含有好豐富既維他命C，仲好香添呀。每天一杯檸檬水，身體健康d，感冒都少d。
溫馨提示：檸檬水好酸的，但都最好唔好加糖啦。糖份多吃無益，過多糖份唔止有患糖尿病既危險，仲會幫身體儲濕，好大鑊架。同埋有胃病既人都要小心飲用，太酸都會傷胃的。仲有仲有，飲完檸檬水記的用清水漱漱口呀，酸性食物飲品都好易傷到牙齒的。
檸檬
青檸
沒有留言:
張貼留言